Эрзянский институт

Произнесенное мною впервые: МОН-ЭРЗЯ! - вызвало у меня целый шквал эмоций: я почувствовала небывалую гордость, значимость, было ощущение, что я "выросла" в своих же собственных глазах, появилась какая-то необыкновенная легкость, окрыленность, глаза словно иначе стали смотреть на мир, какой-то внутренний свет зажегся внутри. Это совершенно невероятные ощущения, ни с чем не сравнимые. Конечно, со временем они притупляются, но, когда огонек внутри начинает затухать, я повторяю вновь и вновь: МОН-ЭРЗЯ! Эти слова таят в себе сакральный смысл. Татьяна Ротанова

Мелькужо » ЭРЗЯНЬ СЕРМАДЕЙТНЕ » МАСТОРАВА . ЭРЗЯНЬ КЕЛЬСЕ
	лиятаркас

Сермадыцясь

Сообщение

admin

эрзянский институт АШТЕМА-КУДО/ASHTEMA-KUDO

Сообщение: 3
Совась мелькужос: 29.11.09
Репутация: 0

Казямкатне:

Кучозь: 30.11.09 22:53. Заголовок: МАСТОРАВА . ЭРЗЯНЬ КЕЛЬСЕ

Икельце валонь таркас

«Масторавасонть» васенцеде вейке лувс пурназь минек космогониясь; менелень ды масторонь пазтнэнь пантеонось; героической эпикась — эрьва кодат кезэрень исторической моротне-евтамотне ине героест марто, конатнень ютксо куншка видьсэ ашти Тюштя инязорось; койтне-илатне, перть пельксэнть ды эрямонть лангс вановкстнэ, эстетикась, философиясь, педагогикась.
Эпосось ванстынзе неень шкас эрзянь ине геройтнень лемест: Инешкипа-зонть (мирэнть-масторонть теицянть), Ан-генть (Инешкиаванть, мазыйчинь пазаванть), Идемевсенть (идем вийтнень азоронть), Куда-деенть (эрзянь раськенть ушодыцянть), Тюш-тянть (эрзянь масторонть пурны-цянть), Нарчатканть (мокшонь чинязор-аванть, печказтнэнь каршо набой тюрицянть), Саманьканть (Казань ошонть саицянть) ды ламо лиятнень. Сынь весе — минек раськенть каштанчись ды мазыйчись.

А. М. Шаронов, 1994 ие

Каршо валт - 4 [только новые]

admin

эрзянский институт АШТЕМА-КУДО/ASHTEMA-KUDO

Сообщение: 4
Совась мелькужос: 29.11.09
Репутация: 0

Казямкатне:

Кучозь: 30.11.09 23:32. Заголовок: МАСТОРАВА Ушоткс П..

МАСТОРАВА

Ушоткс

Покштояк ульнесь седе покш пакся.
Се покш паксясонть — сэрей губорь пря,
Губорь принесэнть — ашине килей,
Ашине килей, мазыйне килей:
Менеленть келес срадсть тарадонзо,
Масторонть келес срадсть ундоксонзо,
Моданть пачк таргавсть-венстявсть санонзо.
Килеенть ало пурназь столь ашти,
Се столенть экшсэ покштят озадот.
Сисем велень сынь коень содыцят,
Равонь эрзятнень лувонь муицят.
Весе покштятне шержей сакалнэть,
Шержей сакалнэть, ашо прячернеть.
Эйсэст кавани тейтерь-тякине,
Тейтерь-тякине, бояравине.
Килеенть прясто ваны Пазнармунь,
Ваны Пазнармунь, сон Иненармунь.
Ломань валнэсэ нармунь пшкадекшнесь,
Ломань кельнесэ нармунь кортакшнось:
— Кунсолодоя тынь, сисем покштят,
Коень содыцят, лувонь муицят,
Ине Рав лангонь кезэрень эрзят.
Тынь марямизь монь, шержей сакалнэть,
Ашо прячернеть, коське рунгинеть.
Мон тыненк евтан содамоевкске,
Содамоевкске, ежов кортавкске:
Ки селмовтомо менельга ливти?
Ки пильгевтеме масторга чии?
Ки ундокстомо чинть ало касы?
Эзизь содакшно сисем покштятне,
Ине Рав лангонь кезэрь эрзятне
Содамоевкскенть, ежов кортавкскенть.
Чарькодекшнизе тейтерь-тякинесь,
Тейтерь-тякинесь, бояравинесь.

— Тынь кунсолодо, сисем покштинеть,
Ине Рав лангонь эрзянь атинеть,
Мон тенк евтаса содамоевкскенть,
Содамоевкскенть, ежов арсевкскенть:
Ливти истяня валдо Чипазось,
Чии истяня лейтнесэ ведесь,
Касы истяня ломанень рунгось.

Тейтерь-тякинесь евксонть содызе,
Путынзе превнес шержей покштятнень.
—Вай, тон превеят, тейтерь, ежоват!
Мейсэ каземс тонь покш превтнень кисэ?
—Сюкпря, покштинеть, ашо прячернеть!
Пазчангот тыненк яла улезэ!
Мезеяк пельденк тень а эряви.
Бути евтавлинк, покштят, пачтявлинк,
Кода Мастор чачсь, кода койть раштасть
Весемень туртов кеняркс улевель.
Кезэрь моротнень эрьга лецтинка.
Кунсолосызь сынст неень эрзятне,
Марясызь Мокша лангонь мокшотне —
Превсэ кирдемест кармить пингезэст.

Сисем покштятнень ютксо ве покштясь —
Сехте шержеесь, нама, кезэресь,
Варштась перть пельга сыре сельмесэ,

Лекстясь домкасто, кундась валбринес.
Кармась евтнеме сон пингень евксонть,
Ушодсь эрямонь моронть морамо.
Шождыне ялткесь лоткась пувамсто,
Килей лопатне лоткасть сорномсто.
— Кунсолодоя монь, эрзят, мокшот!
Пуромодоя перькан, сыреть, одт!
Ушодан моро Масторавадо —
Чачомадонзо, касомадонзо.
Мон эрзянь койненть тыненк евтаса,
Мон мокшонь иланть тыненк пачтяса.
Содадо, косто эрзят, мокшот лиссть,
Кода сынст келест ды коест теевсть.
Содадо, эрзят, содадо, мокшот,
Ки нолдыдизь тынк Масторава лангс,
Ки максызе тенк чачонк-обуцянк,
Ежонк ды превенк паро эрямос.

admin

эрзянский институт АШТЕМА-КУДО/ASHTEMA-KUDO

Сообщение: 5
Совась мелькужос: 29.11.09
Репутация: 0

Казямкатне:

Кучозь: 30.11.09 23:33. Заголовок: ПАЗОНЬ ПИНГЕ Васенц..

ПАЗОНЬ ПИНГЕ

Васенце ёвтамо

МАСТОРОНЬ ЧАЧОМА

ИНЕШКИПАЗ

Васня чачокшнось Инешкипазось
Весемень туртов паро тувталокс,
Моданть, эрямонть валдо ушотксокс.
Сонзэ чачомас, вийс-мельс касомас
Арасель мастор, велькссэнзэ — менель.
Ульнесь ансяк ведь вень чоподасонть.
Се иневедьганть, певтеме венть пачк
Уйсь сон састыне ашо кев лангсо.
Потмураль сонзэ сэтьме чамазо,
Нусманят ульнесть валдо сельмензэ.
Арсесь сон яла стака арсема,
Ине мель раштась ашо прясонзо.
—Мода-Мастор тень эряви теемс,
Нолдамс койть-илат, ломанть ды раськеть.
Ансяк ськамон, нать, вием а саты,
Бути сатыяк — аволь педе пев.
Арась лелям монь, арась ялаксом,
Арась ялгаяк, тевсэ лездыця.

Нуваргадсь Пазось, сонсь а соды мейс,
Апаро мельсэ сельгсь мик ведентень.
Уи састыне, мель касты кундамс
Седе куроксто арсезь тевентень.
Вана мейс-бути варштась у да лов,
Ней — мельганзо педясь покш губорь.
Те кевекс теевсь сонзэ сельгезэ.
Лоштизе кевенть сон цетмарсонзо,
Губоренть ламо пельксэс тапизе.
Яжазь губорьстэнть кирнявтсь Идемевсь,
Апарось пижнезь лиссь кевенть потсто.
Рунгозо понав, прязо вишкине,
Кургозо келей, сельмензэ кежейть.
Кармась Идемевсь капшазь кортамо,
Ушодсь эсензэ мельтнень евтамо:
— Пек тон сюмордат, Инешкипазом,
Ризнат-мелявтат яла ськамот тон,
Мекс арась лелят, арась ялаксот,
Мекс арась ялгат, тевсэ лездыцят.
Снартнят ськамот тон Мастор тееме
Ды лангозонзо койне нолдамо.
Мекс ялаксокс теть монень а улемс?
Мекс ялгинекс теть монень а улемс?
Мель явиндерят — улян ялаксокс,
Мель евтындерят — улян ялгакс теть.
Нучкань седееть сестэ витеви,
Тевтне арсевить, парсте теевить.
Ульть а ялаксокс, ульть аволь ялгакс
Ульть, бути маштат, тевсэ лездыцякс.
Нейке ушодан Мастор тееме,
Тон монень кармат човар кантнеме.
Истя муеви смусть эрямосон,
Кадса тевтеме ведьга лытамонть.
— Мейстэ Масторонть, Пазом, тейсынек,
Бути ансяк ведь ашти алонок,
Кона певтеме сравтовсь перть пельга,
Конанень арась а ушоткс, а пе,
Конанень арась, паряк, потмакскак?
Пазонть лангс пелезь ваны Идемевсь,
Учи пельдензэ валонь евтамо.
— Тень кувалт тонеть а мейс мелявтомс.
Теде а тонь прясь карми арсеме.
Веденть потмаксос азе чопавтька,
Тосо човарось ламодо ламо.
Зяро кандови, зняро сайть тосто.
Сонзэ эйстэ минь Мастор тейтяно.
Кодак тееви Масторавинесь,
Нолдан койть-илат, ломанть ды раськеть.
Ней тон кунсолок, мезе мон мерян.
Зярдо човаронть кармат саеме,
Монь лементь васня лецтик, Идемевсь,
Ранкстак «Пазчангот!» — мейле кундак тевс.
Вант, иля стувто, мезе мон меринь,
Стякос якамот иляк ютавто.
Бути тон стувтсак монь лементь лецтямс,
А ули мелеть пшкадемс «Пазчангот!»,
Веденть потмакссто човар а кандат,
Апак тееве тевесь кадови,
Уйнят лескстэме мекев-васов тон.

Домка ведентень чопавтсь Идемевсь,
Коронь кирдезь тусь кельме потмаксов,
А мельспаросо кундась тевентень.
Каштанчись ормакс нарьгась эйсэнзэ,
Кодаяк тензэ сон эзь изняво.
Весемень кувалт эсензэ превсэ
Благой Идемевсь снартнесь арсеме,
Весемень кувалт эсензэ кельсэ
Аксун Апарось бажась кортамо.
Веденть ало сон Пазонть стувтызе,
«Пазчангот!» валось тензэ эзь меревть.
Эсензэ лемесь тосо лецтявкшнось,
Эсензэ лемесь кельбряс кундавкшнось.
Секс веденть алдо човар эзь саевть.
Чаво кедьсэ савсь мекев велявтомс.
Кирвитол кивчкадсь домка отьмасонть,
Зярдо човаронть кармась саеме.
Те толонть потсо тунь сон таймаскадсь,
Емась ежозо, чаракадсь прязо.
Кирнявтсь ве енов — кирвитол палы,
Кирнявтсь омбоцев — палы тол кирви.
Човар саеманть сеске стувтызе.
Вейкеде арси: кода оргодемс
Те толонть потсто, ведь лангов лисемс.
Тей-тов якстере толонть пачк ливтни,
Теке раужо ендол кивчкаи.
Вана муизе мекевлангонь кинть,
Велявтсь Пазонтень, корты-пеняци:
— Мон эль-эль, Пазом, оймем идия,
Човаронть кувалт а мезть кортамскак.
Кода пачкодинь веденть потмаксов,
Кирвазсь палы тол домка отьмасонть,
Эзимим нолда сон човаронть ваксе.
Стяко ансяк мон толсо пицевинь.
Аздан, мезень кис истят тарькст кирдян.
— Азе таго тон веденть потмаксов,
Омбоцеде тук човар саеме.
Кодамояк тол а токатанзат,
Бути монь лементь тосо лецтясак,
Пшкадят «пазчангот!» каштанчивтеме.
Мекев ведентень чопавтеь Идемевсь,
Тусь омбоцеде човар саеме.
Ансяк каштанчись нейгак невтизе
Превтеме прянзо, равжо тюсонзо.
Таго стувтозель Пазонть лемезэ,
Апаколь мере «пазчангот!» валось.
— Мейс карман Пазонь лементь лецтнеме,
Бути седе ен монь эсень лемем?
Ды эсь лемензэ кельбряс ливтизе.
Секс седеяк покш тосо тол кирвазсь
Ды азаргадозь кармась пултамо
Човар саицянть, Пазонь манчицянть.
Секень вант, ансяк куловт кадовить.
Сонськак а соды Идемевсь, кода
Пельс чентязь толонть потсто оргодевсь,
Ежовтомо лиесь сон веденть алдо
Ды чаво кедть стясь Пазонть икеле,
Ордадозь прянзо а лов нолдызе.
— Мекс тон сэредезь лексят, Идемевсь?
Евтак, кодамо орма саинзеть?—
Кевкстизе Пазось сонзэ еэтьместэ.—
Паряк, човаронть кандомсто сизить?
Эрьга невтика тень стака канстонть!
Кувси Идемевсь, пувси пицевкстнэнь,
А мезе невтемс тензэ Пазонтень.
— Мезеяк тосто, Паз, а кандови.
Ансяк кенерян алов валгомо,
Кирвитол сеске гувнозь кирвази
Ды монь пултамо каяви сэрьгам.
Арсян, стяко тов, Пазом, монь панеят.
Се човарось, нать, а минек туртов.
Малазонзо мик мон а шаштован.
— Лецтякшнык-эзик тосо монь лемем?
Мерекшнить-арась: «Пазчангот, Шкипаз!»?—
Пазось кевкстизе азгун апаронть —
Эсензэ кежень сельгстэ теевксэнть.
А сепови ней, нама, манчемась,
Секс Идемевсесь виденть евтызе:
— Эзия лецтне тосо тонь леметь,
Эзинь пшкале мон «Пазчангот, Шкипаз!»
— Кинь эно лементь отьмасонть лецтик?
Кинь превсэ-мельсэ тосо тон арсить?
— Эсь лемем веденть ало лецтия,
Каштанчим превтнень максокшнынзе тень,
Монсень удемем чачтокшнынзе сынст.
— Эряви кадомс неть арсематнень.
Ертыть каштанчинь превтнень, Идемевсь,
Стувтыть пря шнамонь мельтнень, Апаро.
Азе ведентень таго тон чопавт,
Мекев уйть морянь кельме отьмантень,
Тосо сайть човар, зяро эряви,
Зяро кандови курго потмосот.
Кодамояк тол а неят тосо,
Ансяк иляк стувт монь лемем лецтямс
Ды евтамс мазый «пазчангот!» валонть.
Бути тагояк Паздо безардезь
Кармат ветямо каштанчисэ прят,
Иля пизямкшно, иля пеняця:
Кирвитолось тунь сеск пултатанзат,
На той куловткак эйстэть а кады.
Одов Идемевсь чопавтсь ведентень,
Колмоцеде тусь сон човар мельга.
Ней Пазонь валтнэ удемес чаповсть,
Ертовсть прястонзо пелькстамонь мельтне.
Каштанчись энгамсь, корозо мендявсь,
Пелемась нарьгась-изнясь эйсэнзэ.
Секс эзь карма сон прянзо шнакшномо.
Пазонть лемензэ сеске лецтизе.
«Пазчангот, Шкипаз!» — мерсь сорноманть пачк.
Теде мейле мольсь човаронть малас.
Ведень потмаксось аштесь сэтьместэ,
Эзь пурга каршо чамас кирвитол.
Зяро келькстявсь кургс, зняро човар сайсь
Ды мекев велявтсь Инепазонтень.
— Вана, Шкипазом, ливтинь теть човар,
Топавты мелеть, кода мерезель.
— Несак, пек парсте тевесь тееви,
Бути кунсоломс Инешкипазонть,—
Шназь ульсь Идемевсь чевте вайгельсэ.
Ансяк а весе кандозь човаронть
Ятось максызе Инепазонтень,
Зяро-бути кадсь курго потсонзо,
Нилешка паморькст кекшсь пей удало.
Таго снартнесь сон Пазонть манчеме,
Седейзэнзэ мель истямо совавтсь:
«Мои ведьс чопавтнинь, мон човар таргинь
Мекс весе максомс сонзэ Пазонтень?
Кадык Шкипазось Мастор эсь койсэ
Теи-аравты, парсте важоди.
Ванноса сонзэ тевенть — редяса,
Мейле монсь кундан апак кавтолдо
Мастор тееме, Мода кастомо.
Карми улеме сон Идемевсень
Арсемань-мелень, тюсонь кондямо».

Ушодсь човаронть Пазось кайсеме,
Сыргась перть пельга сонзэ ертнеме —
Прок товзюросо пакся видеме.
Кармась човарось нейке касомо,
Теевеме пек паро Масторокс,
Арамо мазый валаня Модакс.
Ушодсь касомо сеяк човарось,
Тонаськак кармасъ Модакс арамо,
Конань Идемевсь Паздо сепизе,
Салава пейтнень экшес кекшизе.
Пшдошка теевсь Апаронть прязо,
Иневедь келес автевсь кургозо.
Човарось касы истя кежейстэ —
Вана удемесь пурги прястонзо,
Лисить сельметне, сезить пилетне.
Стардызе сонзэ куломань орма —
Санонь кериця, оймень саиця.
Секс сон печкема тувокс пижакадсь,
Пиже-ожо гайть кургстонзо нолдась.
Се пижнемадонть, се рангомадонть,
Седеень кери сянгор вайгельдентъ
Пестэ пес иневедесь кумболгадсь*,
Толкунт ланганзо сыргасть ардомо.
— Мезе истяня пулот лепштизе,
Паряк, мон апак фатя чалгия?
Мик пилем цийнить тонь пижнемадонть.
Эрьга евтака, мезе мартот лиссь?—
Пейдезь пшкадсь Пазось Идемевсентень.
— Човаронть аволь весе максыя,
Пеем удалов паморькст кадовкшность.
Арсинь, Инепаз, монгак тонь ладсо
Мейле Масторнэ эстень тееме.
Ней прям потсо сон теке азаргадсь:
Касы-келеми, чачк сези сонзэ.
А евтавияк, кода сэреди
Модасо пештязь пандошка монь прям.
Марян, Куломась сонсь тозонь эцесь.
Яходсь Шкипазось кшнинь цетмарсонзо,
Таргозезь ятонть касмос риштизе
Ды мерсь сонензэ седеень марязь:
— Сельгика эно кекшезь човаронть,
Чамдык бойкасто пижниця кургонть,
Сестэ кадтанзат апаро ормась,
Прок арасельгак, еми сэретьксэсь.

Идемевсь капшазь ушодсь човаронть
Сельгенемензэ пейтнень удалдо.
Сон истя пургась, сон истя какстась,
Мерят кургстонзо сисем даволт менсть.
Неть даволтнэде вецана модась
Теке кши чапакс ведьсэ лыказевсь,
Кармась лымбакстнезь састо чирькамо.
Те лыкамодонть ды чирькамодонть
Мазычинть курок сон емавтызе.
Васня ульнесь сон ванькс ды валаня,
Прок сыре букань пувавозь пузырь.
Ней рунгованзо лушмот-латкт сралесть,
Эрьва косо кассть покш пандт ды губорть. —
Пандя сельгенемс!—ацирьгадсь Пазось.—
Кургот чамдовсь ней, лоткак пургамсто.
Вант, Масторонть тон колык чачонзо.
Эрьга тень кисэ ойметь витнеса,
Превтнень аравтсынь, козонь эряви! —
Ды Идемевсенть таго лоштизе
Кшнинь цетмарсонзо касмонзо ланга.
Идемевсенть мик сельмензэ тетькевсть.
Кирнявтсь верев сон, укстась ды оймась.—
Пек ине зыян тон ва теевлить,
Бути монь вием аволь сатстово
Неть тонь колавкстнэнь паров велявтомс.
Сия ды сырне мон пандтнэс путан,
Домка латктнева лисьмапрят нолдан.
Кадык сынь максыть ламо парочи
Масторавантень ды ломантненень,
Конат ва чачить монь мелем коряс.

Мейле теизе Пазось менеленть —
Мода-Масторонь сэрей вельтявксонть.
Пургизе верев сон иневеденть,
Ойме коштсонзо сонзэ сравтызе —
Парсей шаршавокс сэняжась арась.
Менеленть куншкас Пазось чи понгавтсь —
Весе перть пельксэсь валдомгадсь сеске.
Зярдо чизэ валгсь, сиянь ков нолдась —
Суронь пачалксе каштом кургосо.
Вень чоподантень валдо тештть сустась,
Кода суро ямкст сокань модас правтсь.

Менелентькак снартсь Идемевсь коламс,
Арсесь витнеме сонзэ эсь ладсо.
«Эли Паздо мон седе берянян?
Эли Паздо мон седе нузяксан?
Пазось эстензэ тейсь сэрей менель,
Менелев нолдась сырнень чи ды ков,
Ковонть удалов понгавтсь ламо тештть.
Моненьгак менель теемс эряви,
Монгак менелев нолдан чи, ков, тештть».
Ва Пазонть кондякс лексема коштонть
Сон кургостонзо кармась пувамо.
Се Идемевсень апаро коштто
Пештявсь менелесь раужо пельсэ.
Се пельтнень алга вармат пувазевсть,
Коволт яказевсть, натой чись кекшевсь,
Срадсь чопода ве Масторонть велькска.
— Таго покш зыян тон ва теевлить,
Бути монь вием, ят, аволь сато
Те тонь апаронть парокс велявтомс:
Эрямонь ведьсэ пельтнень пештясынь,
Кадык сынь вере менельга ливтить,
Пиземеть пизить Мастораванть лангс,
Теить эйсэнзэ рапуднавицякс*,
Чувтонь ды тикшень, сюронь чачтыцякс,
Паронь, сюпавчинь, лезэнь кандыцякс.
Варма коволтнэ, конатнень ламо
Сэнь менелентень кургостот нолдыть,
Кадык ливтявтсызь менельга пельтнень,
Иневедтнева венчтнень уевтьсызь,
Зярдо ломантне кармить маштомо
Лейга, эрькева калонь кунцеме,
Масторсто масторс инжекс якамо...
— Мезе а теян, мельзэть а туи,—
Кеждязь Идемевсь Пазнэнь пеняци,—
Мон, тонь лангс ванозь, теинь парочи,
Мекс эно сонзэ ловсак зыянокс?
— Вана мезе мон тень кувалт евтан:
Эрьва парочись тонь — Идемевсень,
Се тонеть паро, мезесь монь туртов
Зыян ды орма, риске ды лажамо.
Секс а маштоват монень лездыцякс,
Секс а эряват тон превс путыцякс.
Масторонть лангсо миненек вейсэ
А эрямс-аштемс, а якамс-пакамс.
Пингеде пингес улят тон сюдозь.
Кадык Мастором, чопавт ведентень,
Иневедь алдо варя-ласкске муйть,
Се варянть эзга совак мода поте.
Тосо тонь таркат. Тосо тон эряк.
Зярдояк тосто иля лиснекшне
Мастораванть лангс, косо мон карман
Ламо вадря койть-илат нолдамо.
— Улезэ истя, кода мерят тон! —
Идемевсь евтась Инепазонтень. —
Инязорат тон Масторонть лангсо,
Мон инязоран Масторонть ало.
Ансяк а видеть ульнесть неть валтнэ.
Идемевсь арсесь Пазонть манямо.
Эзь туекшне сон мода варява,
Эзь валгокшно сон Масторонть алов.
Пандо удало латке сон кекшекшнесь,
Губорь удало лушмос эцекшнесь.
Тосто арсесь сон сокор ветнестэ
Лиснемс апаро тевтнень тейнеме.

— Пазчангот, Мастор! Вадря ультяя! —
Паро мельсэ пшкадсь Инешкипазось.—
Панезь Идемевсь, уцяскань ятось.
Мазычинь тюсос, Мастор, совака!
Вельтявт тикшесэ, оршавт чувтосо.
Кадык сэрей вирть ды пиже лайметь
Лангат-мештеват, Мастор, сравтовить.
Алтан парочи тонеть, шумбрачи.
Паксява, вирьга чудевтян мон лейть.
Лейс нолдан мон калт, паксяс, вирьс — нармунть,
Нармунде башка, овтт, ривезть, ту вот,
Чинеметь*, реветь, лишметь, скалт, сеят,
Кискат, ну молот — эрьва мень ракшат!..
Кода Пазось мерсь, истя весе лиссь.
Кода сон арсесь, истяня теевсь.
Алтазь парочись Мастор лангс совась,
Мазый гайть ды жойть сонзэ пештизе.

КОЛМО КАЛАВАТ

Вете чить тевсэль Инешкипазось,
Важодсь дошузсто паро ежосо.
Котоце чистэ таго тевс кундась,
Мода-Масторонть поладсь кастомо.
Иневедентень нолдась колмо калт,
Колмонест калтнэ мазый калават,
Калавинетне сынь патят-сазорт.
Арсить, прят чавить колмо сазортнэ,
Вейке мельс кундыть калавинетне.
Мезде сынь арсить, мезде мелявтыть?
Мезень кисэ сынь прятнень майсевтить?
Сехте покш калось, васенце патясь,
Кармась кортамо лия калтнэнень:
— Ух и, сазорнэть, тынь монь раськинеть!
—Ух и, сазорнэть, тынь монь вечкевикст!
—Велявтынка тынь монь енов кургонк,
Седе малазон пиленк ладинка.
Мезе мон евтан, кунсолодоя,
Кавто пилесэ, сазорт, марядо.
Секс чачинек минь иневедентень,
Секс тей нолдымизь Инешкипазось —
Колмо стакань сон, сазорт, кирдеме,
Колмо стакань сон, сазорт, снартомо.
Масторонть улить колмо ужонзо.
Масторонть улить колмо отьманзо.
Колмо ужова миненек арамс,
Колмо отьматнес миненек молемс.
Тосо рунгонок минь ладясынек,
Эсь лангозонок Моданть путсынек.
Карматано минь пингеде пингес
Колмо стакатнень, сазорт, кирдеме,
Колмо стакатнень, сазорт, кандомо,—
Сехте покш калось, васенце патясь,
Корты, мель яви лия калтнэнень,—
Чилисемав мон, сазорнэть, туян.
Чикуншкинев тон, омбоцесь, туят.
Чивалгомав тон, веженсесь, туят.
Пазчангот, сазорт, тыненк мон мерян.
Коданя туян мон чилисемав —
Ведесь пешкеди чирестэ чирес.
Кода омбоцесь чикуншка енов
Туи уеме веденть потмакска,
Чачк иневеденть кавтов сон явсы,
Чипазонть несы вере менельстэ,
Лайме лангс сестэ лиси се ведесь.
Кода юводи* колмоце калось —
Чадыведь туи Масторонть ланга,
Лейть-латкт пешкедить ине ведтнеде.
Эрь ней явтано, сазорт, адядо,
Вейке-вейкенень сюконятано,
Одов зярдояк минь а нейтяно,
Вейке-вейкенень а васодтяно...
Арасть Масторонть колмо ужова
Колмо стакань сынь, калтнэ, кирдеме,
Колмо стакань сынь, калтнэ, кандомо.

admin

эрзянский институт АШТЕМА-КУДО/ASHTEMA-KUDO

Сообщение: 6
Совась мелькужос: 29.11.09
Репутация: 0

Казямкатне:

Кучозь: 30.11.09 23:34. Заголовок: АНГЕ Кото чить тев..

АНГЕ

Кото чить тевсэль Инешкипазось.
Ва сисемеце чись зорясто сти.
Палы тол кирвазсь Пазонть седейсэ,
А содавикс мель чачсь мештезэнзэ.
Теке чи цитнить кавто сельмензэ,
Масторонть пештить сиянь валдосо.
«Мезень истямо орма саимим?
Мезень оймесэнь тантей майсема?» —
Шкипазось арси, снартни содамс сон
Те кецявтыця ормань тувталонть.
Арсесь, арсесь сон — арсевсь арсемась.
Варштась мёнелев, варштась ведентень,—
Вере менельсэнть чись пейди-налкси,
Сонзэ ало сэнь ведесь сияжды.
— Чи ды ведь,— сон мерсь,— вейс сюлмаводо,
Анге, Ава-ни монень чачтодо!
Ва ведьсэнть виев толкунт кепететсть,
Човсто кувтолт сынь пивтсть ды ематотсть.
Човонть потсто лиссь нусманя Ава.
Ашо панарсо рунгозо оршазь,
Сырнень карнесэ пильгензэ карсезь.
Конянзо ланга валдо чись лиси,
Касмонзо ланга ожо ков валги,
Черензэ пева тештне цивтердыть.
— Анге, чалгака Мастораванть лангс,
Ультяя монень, Ава, ни-пола,
Мазый эйкакшонь, Анге, чачтыця,
Кудонь-парочинь, Ава, ванстыця.
Ульть тон мазыйчинь, Анге, Пазава,
Эрямо лувонь ульть азорава.
— Тон, Инешкипаз, вешить ни-пола.
Вана сынь тонеть арсемат коряс.
Мезе мерят тон, полакай, теян,
Ков кучсамак, тов, азором, молян,
Кудонь раштыцякс карман улеме.

Эрязь-аштезь чачсь Анге сисем эйдть,
Сисем пакшат кандсь Инешкипазнэнь:
Ниле церынеть, колмо тейтернеть.
Васенце церась ульнесь Верепаз,
Омбоце церась ульсь Пурьгинепаз,
Колмоце церась ульнесь Веленьпаз,
Нилеце церась ульнесь Масторпаз.
Васень тейтересь ульнесь Кастарго,
Омбоцесь ульнесь ежов Везорго,
Колмоцесь ульнесь мазый Ведява.
Весе Шкипазнэнь сынь вельть вечкевикст,
Кастыть мелензэ, витить ежонзо.
Ансяк мекс-бути Пазось а ойми, —
Сон седейсэнзэ покш мелявкс кантни.

admin

эрзянский институт АШТЕМА-КУДО/ASHTEMA-KUDO

Сообщение: 7
Совась мелькужос: 29.11.09
Репутация: 0

Казямкатне:

Кучозь: 30.11.09 23:35. Заголовок: ЛОМАНЬ Ваны Шкипаз..

ЛОМАНЬ

Ваны Шкипазось Мастораванть лангс —
Арась эризэ, арась аштизэ.
Арась виртнесэ чувтонь керизэ,
Пиже лаймесэ — тикшень ледизэ.
Апак керя вирь стяко сявори,
Пиже тикшетне истяк наксадыть.
Арси Шкипазось койне нолдамо,
Бажи Инешкись илань тееме.
Ськамонзо тензэ те эзь арсеве,
Эсь превнесэнзэ те эзь цётаво:
Кодамо койне нолдамс эряви,
Кодамо ила теемс эряви.
Тердизе Пазось мазый Кастаргонь —
Верепаз мельга сонзэ кучизе.
Мерсь сон куроксто церанть тердеме,
Вейсэнь превнесэ само арсеме,
Вейсэнь кортамот само кортамо.
Омботькс тейтеренть, важов Везоргонь,
Нейке тердизе Инешкипазось.
Пурьгинень кисэ сонзэ кучизе.
Омботькс теранзо кармавтсь тердеме
Вейсэнь кортамот само ветямо,
Вейсэнь превнесэ само арсеме.

Вана Верепаз Пурьгине марто
Инешкипазонь кудос молекшнесть,
Вейке превнесэ сакшность арсеме,
Тетянь кудосо тевень цётамо.
Инешкипазось келей столензэ
Кудо куншкантень сынст кис путызе
Ды кши руцясо сэрьсэ ацызе.
Кастарго путнесь тантей кши-салнэ,
Везорго нуртясь медень пурине.
Пурьгинепазонть ды Верепазонть
Пазось эземень пряс озавтынзе,
Сонсь кшнинь мукорь лангс озась каршозост.
Кармасть симеме пазтнэ, ярсамо,
Ушодсть вейке сынь превсэ арсеме,
Вейке кельсэ ды валсо кортамо.
Уш кечень-кечень пазтнэ симекшнесть,
Уш кавтонь-кавтонь пазтнэ комавтнесть,
Вейке арсемас колмонест совасть.
Уш колмонь-колмонь пазтнэ копордасть —
Вейке мелявксос колмонест пачкодсть.
Сестэ Инешкись столенть экшстэ стясь,
Кшнинь оршамопельть рунгова оршась,
Кшнинь касмовельтявкс сон прязонзо путсь,
Кшнинь цетмаронзо вить кедьс саизе.
Мейле евтызе потмо валонзо:
— Тон, Пурьгинепаз, ды тон, Верепаз,
Монь кунсоломизь, парсте марямизь,—
Ушодсь кортамо инжетнень марто,—
Мезекс таркасто мон сыргавтыдизь
Ды тетянь кудос инжекс тердидизь —
Вейке превнесэ мартон арсеме,
Вейке кельнесэ мартон кортамо.
Монь чачи-касы Масторавиненть
Араеь эризэ, арась аштизэ.
Арась виртнесэ чувтонь керизэ,
Пи же лаймесэ тикшень ледизэ,
Модань сокизэ, сюронь видизэ.
Мон арсинь, арсинь — ськамон эзь арсевть,
Кодамо ломань теемс эряви,
Кодамо койне нолдамс эряви.
Кодамо кирда путомс эряви.
Вана мезде мон эсь пачкан арсинь,
Ва мезе седей потмосон кирдинь:
Эряви теемс Мастор лангс Эрзя,
Эрзянь лувнестэ койть-илат нолдамс.
Кодамо превнес тынь совавтсамизь?
Кодамо мельнес тынь аравтсамизь?
Кодамо монень вал евтатадо?
Эрьга, церат, тетянстэнь лездадо,
Эрявикс превс-мельс сонзэ путодо.
Верепазось ды Пурьгинепазось
Кунсолызь-маризь Инешкипазонть.
Шнызь сынь превензэ, валдо мелензэ
Вейке кельнесэ, вейсэнь валнэсэ:
— Тонь, Инешкипаз, мелеть эсь кедьсэть:
Кода арсесак, истяня тейсак,
Кода евтасак, истя топавтсак.
Кодамо ломань, Инешки, теят,
Истямо койне Мастор лангс нолдат,
Истямо путат тон эрямо кель.
Вечкиндерят руз — руз ломань теят,
Вечкеви татар — тон татар теят,
Вечкеви чуваж — тон чуваж теят,
Вечкеви эрзя — тон эрзя теят.

Кунсолокшнынзе Инешкипазось
Верепазонть ды Пурьгинепазонть,
Верев ертынзе кавто кедензэ,
Алов нолдызе ашназа прянзо,
Яволявтызе потмо валонзо:
—Эрзянь ломанесь мелезэнь тукшны.
Мон васня Эрзя теян Мастор лангс,
Эрзянь кель нолдан, эрзянь кой ладян.
Кадык сон, Эрзясь, азорокс ули —
Сюронь видицякс, вирень керицякс,
Тикшень ледицякс — тевень теицякс.

Пазось сатышка ашо севонь сайсь
Ды кармась, Шкинесь, ломань тееме.
Важодсь седейга, нежедсь покш мельсэ.
Косо ломаненть сон кенярдозь тейсь,
Косо анокстась азор Модантень?
Ине лей лангсо, Равонть чиресэ,
Пичень вирь потсо, цецянь кужосо.
Вана ломанесь теезь, анокстазь
Инешкипазонть эсензэ тюссо.
Ваннызе Шкинесь кедень теевксэнть —
Весеме ендо Эрзя удалась:
Рунгозо виде, мештезэ келей,
Черензэ ашот, сельмензэ валдот,
Чамаежозо сэтьме ды мазый,—
Сон комсь иесэ паро од цера.
Ансяк оймензэ зярс а тарксесы.
Эряви максомс ней тензэ ежо,
Прязонзо путомс превть, мельть, арсемат,
Кармавтомс сонзэ кельсэ кортамо.

Инешкипазось арси, превть ташты,
Масторавантень азор аноксты:
Коень кандыця, илань ванстыця,
Модань сокиця, сюронь кастыця.
Чись куншкас пачкодсь.Масторонть ланга
Чевте варминесь лоткась пувамсто.
Ведесь а лымби. Виресь а увны.
Те шкасто Пазось вечки оймсеме,
Мадни удомо путонь кудосо.
Кадызе Шкинесь теезь ломаненть
Цецянь кужонтень цютькес ськамонзо.
Идемевсь вана чикуншка ютксто
Лисни якамо Масторонть ланга,
Ваны, мезть тейни Инешкипазось.
Нейгак сеск сон мольсь тона таркантень,
Косо ськамонзо аштесь ломанесь.
«Вана кодамат тон, Пазонь эйкакш!—
Серьгедсь Идемевсь эсь потмованзо.—
Вейкеяк ильветькс, берянь енкс арась.
Пазонь превнесэ парокс кантнезят.
Ансяк истяня, содак, а ули.
Мон витевкст теян, мон петевкст кадан.
Виде рунговат, мазый чамават
Мон Идемевсень сермадовкст тештян...»

Сявадомадонть ятось — Идемевсь —
Тарка а муи, натой ормалгадсь,
Прась мельсапарос ды кежиявтозь
Кундась зыянов тевень тееме.
Васня ломаненть сон сельгенизе,
Мейле тарадсо сонзэ нерькстнизе,
Снартнесь пильгстэ пряс мик коламонзо.
Натой оймензэ арсесь максомо
Инешкипазонь теевть Эрзянтень.
Ансяк Апарось важодсь чавосто,
Стяко ломанень чаманть лангс пувась.
Эзь лисе истя, кода сон арсесь:
Раужо оймесь эзь совавтово,
Нама, рунгозо весе колызе.

Вана чись чиремсь валгома пелев.
Инешкипазось сы мекев кужов.
Ваны: тамашат! Эрзянзо перька
Чары Идемевсь, вели Апарось.
— Велянзяк тестэ, аксун Анамаз!
Таго тон тевем снартнят коламо.
Ансяк а лиси одов мезеяк.
Ломанентькак мон мекев витнеса,
А улить колавкст рунгонзо лангсо.
Азе тов, козонь мон тонь панитинь,
Ды аштек тосо пингеде пингес.

Идемевсь оргодсь пандо удалов,
Пазось ломаненть кармась витнеме.
Шлизе, нартнизе парсте рунгонзо,
Ваны — редявить сельгень чахмантнэ*.
Сестэ саизе Пазось ломаненть —
Ингельде пельде сэрьс велявтызе.
Кекшевсть колавкстнэ, емасть аксоркстнэ,
Ансяк кадовсть сынь ломаненть потмос
Ды те шкас ванстовсть ормань тувталокс.
Кандыть сынь тензэ пек ламо з.ыянт,
Эрямонзо перть эйсэнзэ нарьгить.
Зярдо ванськавтовсь теезь ломанесь,
Пазось казизе сонзэ оймесэ,
Эрямонь печтямс виев ежосо.

Идемевсь нейгак маласо аштесь —
Пандо чиресэ покш кев удало.
Тосто салава вансь Пазонть мельга:
Кода витнинзе сон ломанентень
Кежей серетькстнэнь, ламо колавкстнэнь;
Кода Эрзянтень ойменть путызе
Ды виев ежонть тензэ максызе.
Зярдо ломанесь весе теезель,
Лиссь Идемевсесь кевенть удалдо,
Нулготькс вайгельсэ кармась гонгомо:
—Монгак, Инешким, теинь ломаненть,
Секс энялдан теть тунь апак пеле,
Кортан апак виздть ва мезень кувалт:
Сонзэ рунгосо, чама чачосо
Кадык монь пельде ули мезеяк.
Мейс арсят кадомс тон монь пайстомокс?

Инешкипазонть арась мелезэ
Анок ломаненть, пек паро Эрзянть
Кавтов явомс те Апаронть марто.
Секс сон мерсь тензэ, сюдозь ятонтень:
Тон эзить тее ломаненть эйсэ.
Тон яжить сонзэ, пештик сэретькссэ,
Нарьгий ормасо недик рунгонзо.
Мон эсень койсэ теинь эйсэнзэ,
Секс ве пельксэзэ ялатеке монь.
Эрьга максыка ве пельксэнть монень!
Кодамояк пелькс тонеть а максан.
Аволь пелькстэ те ломанесь теезь,—
Кежей вайгельсэ пшкадсь Инепазось.
Окойники сон истя кортазевсь:
Эрзянть чачозо, паро тюсозо,
Сюпав оймезэ, валдо превензэ,
Виде рунгозо, лембе верезэ,
Ванны сельмензэ, моли пильгензэ
Монь пельде саезь, монь мельсэ теезь.
Тонь кадык улить ансяк орматне —
Стака зыянтнэ, нарьгий серетькстнэ.
Нетнень тон теить, нетнень тон максыть.
Ней таго азе тук Мастор лангсто,
Оргодть мода поте, эсеть таркантень.

Вана истя сынь явизь ломаненть,
Кавто лувнева тетькизь вейкиненть.
Вейке лувозо канды парочи,
Рашты валдо превть, седей вечкема.
Омбоце лувось сюпав зыянсо,
Рискссэ-мелявкссо, стака ормасо.
Весе парочись, седей вечкемась,
Эрямсто валдо превень раштамось
Инешкинть пельде сонензэ максозь.
Рискстнэ-мелявкстнэ, орма-тармотне
Апаронь раштынть кедьсэ казезельть.
Вана секс, зярдо ломанесь кулы,
Сонзэ оймезэ верев кепети,
Сэняжа кива кенярдозь ливти,
Инешкипазонь кудонтень сови.
Рунгозо туи начко модантень,
Чувтомозь мади кельме севонь поте.
Тосо емавтсы сон Пазонь тюсонть
Ды понги урекс Идемевсентень.
Зярдо теизе Пазось ломаненть,
Макссь сонензэ лем: Эрзя-эриця.
Мейле мерсь: «Тон ульть, Эрзя, эриця,
Масторонть лангсо васенце азор:
Кудонь теиця, сюронь видиця,
Тикшень ледиця, вирень кериця.
Эряк-аштек тон, таштак парочи.
Тевтнень эйсэ тейть свал эсеть койсэ,
Весементь лангс вант эсеть сельмесэ —
Яла ульть, Эрзя, тон эрзянь превсэ».

Каршо вал:

1 2 3 4 5 6 7 8 9

показывать это сообщение только модераторам
не делать ссылки активными

Имя, пароль:

зарегистрироваться

Мелькужо » ЭРЗЯНЬ СЕРМАДЕЙТНЕ » МАСТОРАВА . ЭРЗЯНЬ КЕЛЬСЕ

Тему читают:

- совситясь ней куросо

- совситясь тесэ арась

Все даты в формате GMT 3 час. Хитов течи: 13
Права: смайлы истя, артовкст истя, шрифты арась, голосования арась
аватары истя, автозамена ссылок панжомс, премодерация пекстамс, витемс арась

Создай свой форум на сервисе Borda.ru
Текстовая версия